#geweundoon

Vastelaovend in Remunj voor Dummies

 

Tip: Scroll verder naar beneden voor de Nederlandse tekst. 😉

Zo! Goje murge we kinne noe ech gaon aaftelle nao de daag vol lol en plezeer. Nog effe en dan geit de vastelaovend beginne! Gans Limburg ligk plat (en ‘n gedeilte van Braobantj, mer dao viere ze t C waord). In dees blog kint g’r ‘n korte handleijing vinje óm Vastelaovend (in Remunj) te viere!

Dus dich wils weite wie t is óm in Remunj vastelaovend te viere? Laes den veural wiejer, v’r naeme dich aan de handj van ‘n sjtappeplan mit, óm ‘t meiste oet dien vastelaovesdaag te haole.

1. ’T is Vastelaovend! En GEIN carnaval!

2. Kump se nao Remunj? Zorg veur sjmink oppe kuit. Remunj is ech ‘n sjminksjtad! (Moogs ós altied ff belle esse hulp neudig höbs of kiek ’s oppe  facebook van de Sôkkertantes.)

3. Kleijer: Es vroumes moogs se ‘t ganse jaor al sexy zeen. Det hoof neet mit dees daag. Trek dich geweun ‘n jurkje of bóks aan wat euver dien vot haer kump anges kries se kal. En kaerels: trek dich estebleef gein onesie of euveral aan.

4. Nog ff euver dien kleijer. Kiek ’s bie opa of oma in de kas! ’t Is väöl leuker óm zelf get unieks same te sjtelle of te make den kantj en klaor gekoch.

5. Ok drinke.. Besjtel nooit allein! Bösse allein besjtel d’r dan twee en kal ’s mit ‘ne vraemde. En beer, Flügel, Apfelkorn, pk’tjes, Schrobbeler of Jägermeister zeen natuurlijk heel fijn. Mer esse tössedoor ‘ne spa of cola besjtels witse morgen ouch nog wo se vandaag waars.

6. Aete is ouch neet geheel ónbelangriek! Begin mit ‘ne goje baom zo wie sjpek mit eijer, lunch mit ‘n good breudje van Doedels, pak tösse door ‘n nonnevot en aet dich ‘s aoves ‘ne goje burger van Wieck, ‘n lekker biefsjtökske bie de Gelegenheid of werm dich t zoervleis van pap (of mam, of dae waas se zelf höbs gemaak) op.

7. Gank sjoje! Ontdek de sjtad en gank ’s ‘n kroeg in wo se normaal neet kumps.

8. Zing mit! Maak neet oet of se ’t leedje kins. Zing lekker mit!

9. Dans GEIN ich herhaal GEIN polonaise es se ajer den 11 jaor of jónger den 77 bös! D’r zit neet veur nieks NAE in ’t waord esse ’t oetsjpriks.

10. Es emes ‘t haet euver Zjwame-Zuid knik geweun jao.. Doe wèts waal baeter 😉

‘T program:

Donderdig – Es se al zin höbs is d’r her en der al get te doon (sjpaarkasballen). Nog neet zo heftig es ’t Awd Wieverbal in Valkenburg mer waal bès gezellig.

Vriedig – Dan geit ’t in Remunj al ech beginne! Begin op de Sjolefestasie en trek ‘s aoves de sjtad in of maak ‘n oetsjtepke nao Zjwame, die höbbe dan hun Aad Wieverbal.

Zaoterdig – Sjtasiefestasie. Mit artieste van de baoveste plank en gein polsbendje neudig zo wie in Venlo! ‘s-Aoves lekker sjoje inne sjtad.

Zunjig – Tja dat is ‘ne daag dae ederein anges indeilt. De eine geit nao Mestreech veur de optoch, de angere blief in de binnesjtad veur de receptie van D’n Uul of ” ‘T gaat in de zondaag” bie Keffee Le Journal en weer ‘ne angere blief in de eige buurt/dörp wo den ‘ne optoch/receptie/sjpektakel is. ‘s Aoves waert d’r waal weer nao de sjtad gegange, al waert ‘t bie väöl miense neet zo laat wie op vriedig en zaoterdig.

Maondig – Kuukskesmaondig!! Ein van de (al dan neet ‘t) leukste ivvenement van de vastelaovend! Lekker vreug op en bie de tram genete van flink get sjaele wazel. Vervolgens höbs se 3 opties:

1. Kieke nao de optoch
2. Mit doon aan de optoch
3. Aan de bar hange

’s Aoves weer de kroeg in.

Dinsdig – Vandaag gaon v’r Bacchusdrieve en zeen d’r her en der prinse die aaftraeje. Echte kaerels bäöke waal! Es se d’r nog aan dinks gangk dan veural nao ‘t weg träöte van de vastelaovend oppe brök.

Goonsdig – Bienao alle kroege höbbe hering oppe toog ligke. Veur dae vès kinse altied nog ‘n assekruutske haole. Jaomer genòg neet meer gesjmink.
En euver 1 jaor? Dan sjtaon v’r hie weer!

Nederlandse tekst:
Koop ergens Het Remunjs of Zjwaams woordenboek en leer Limburgs! 😉

V’r zeen òs! Alaaf!

Dieke kös,
Judith en Fon

5 reacties

Laat een antwoord achter

Het e-mailadres wordt niet gepubliceerd. Vereiste velden zijn gemarkeerd met *